इटहरी, १ फागुन । नेकपा एमालेका वरिष्ठ उपाध्यक्ष ईश्वर पोखरेलले स्थानीय तह निर्वाचनका लागि आफै उम्मेदवारी घोषणा गर्दै नहिंड्न कार्यकर्तालाई निर्देशन दिनुभएको छ ।
नेकपा इटहरीले आयोजना गरेको अगुवा पार्टी कार्यकर्ता भेलालाई आइतबार सम्वोधन गर्दै उहाँले नेताको घर घर धाएर टिकट नपाइने समेत प्रष्ट पार्नुभयो । स्थानीय पार्टी कमिटीको सिफारिसका आधारमा उम्मेदवार चयन गरिने वरिष्ठ उपाध्यक्ष पोखरेलले जानकारी दिनुभयो ।
उहाँले स्थानीय, प्रदेश र केन्द्रका तीनै निर्वाचनमा नेकपा एमालेले बहुमत ल्याउने दावी गर्नुभयो । उहाँले चुनाव नचाहने गठवन्धनकै दलहरुले अझै पनि विभिन्न कारण देखाएर चुनाव बिथोल्न सक्ने भएकाले सजग रहन कार्यकर्तालाई निर्देशन दिनुभयो । अहिले स्थानीय तहको चुनाव नेकपा एमालेको पहिलो प्राथमिकता भएकाले चुनावको तयारीमा लाग्न कार्यकर्ताहरुलाई निर्देशन दिनुभयो ।
उहाँले देश चलाउने नेताहरुको नालायकि देखेर विदेशीहरुले हेप्न थालेको बताउनुभयो । कार्यक्रमलाई सम्वोधन गर्दै एमाले सुनसरी अध्यक्ष रेवती भण्डारीले अब नेकपा एमालेका सबै नेता कार्यकर्ता तीन महिलासम्म पूर्ण कालिनढंगले वडा वडामा खट्ने बताउनुभयो ।
एमाले इटहरी अध्यक्ष याम सुब्बाले आगामी स्थानीय निर्वाचनमा एमालेले इटहरीका सबै वडा जित्ने दावी गर्नुभयो ।