विराटनगर, ८ मंसिर । गठबन्धनका उम्मेदवारलाई पछि पार्दै मोरङको प्रतिनिधिसभा क्षेत्र नं. ५ बाट स्वतन्त्र उम्मेदवारी दिएका योगेन्द्र मण्डल निर्वाचित भएका छन् ।
सत्तारुढ पाँचदलीय गठबन्धनका तर्फबाट नेकपा माओवादी केन्द्रका उम्मेदवार शिवकुमार मण्डल र एमाले जसपा तालमेलबाट उम्मेदवार बनेका जसपाका राजकुमार यादवलाई पछि पार्दै योगेन्द्र विजयी बनेका हुन् ।
निर्वाचन आयोगका अनुसार योगेन्द्रले २१ हजार ८२० मत प्राप्त गर्दा माओवादीका शिवकुमारले १७ हजार ४८६ मत प्राप्त गरे भने जसपाका राजकुमार यादवले १७ हजार ३९० मत प्राप्त गरेका छन् ।
अघिल्लो निर्वाचनमा काँग्रेसका अमृत अर्याललाई हराउँदै विजयी बनेका माओवादी केन्द्रका नेता शिवकुमार २०७० मा देउवा नेतृत्वको सरकारमा माओवादी केन्द्रको तर्फबाट आपूर्तिमन्त्रीसमेत बनेका थिए ।
विद्यार्थीकालको राजनीतिमा मात्र निर्वाचनमा जितेको अनुभव रहेका योगेन्द्रले संसदीय निर्वाचनको पहिलो अनुभव रहेको बताए । उनले मतगणनाको शुरुवातदेखि नै अग्रता कायम राखेका थिए ।
नेकपा एमालेको प्रदेश कमिटी सदस्यसमेत रहेको योगेन्द्र पछिल्लो ५ वर्षदेखि सो क्षेत्रमा प्रतिनिधिसभाको उम्मेदवार बन्ने तयारीमा रहे पनि अन्तिम समयमा एमाले र जसपाको गठबन्धन हुँदा जसपाको भागमा क्षेत्र ५ पर्दा उनलाई पार्टीले टिकट दिएन । उनले पार्टीसँग असन्तुष्टि जनाउँदै स्वतन्त्र उम्मेदवारी दिएका थिए ।
निर्वाचित भएपछि विराटनगरका सञ्चारकर्मीहरुसँग कुरा गर्दै उनले यो जीत जनताको जीत भएको बताए । अबका दिनमा आफू निर्वाचित क्षेत्रसँगै देशमा गरिबीरहित नेपालको परिकल्पनासहित आफू निर्वाचनमा आएको बताउँदै उनले सोही अभियानमा केन्द्रित रहने बताए ।
सामान्य कुराहरूमा नै जनता दुःखी रहेको उनले बताए । उनले भने, ‘खेतीमा मल छैन, मल बिना किसानले कसरी खेती गर्ने ? सरकारी अस्पतालहरू सुधार्नुपर्ने छ, सुध्रिँदैनन् भने जनतालाई विकल्प दिनुप¥यो । सरकारी विद्यालयको दयनीय अवस्था छ । शिक्षा, स्वास्थ्यलगायत क्षेत्रमा भएका यस्ता विकृति सुधार्नुपर्छ भन्ने विषयमा केन्द्रित रहेर मैले एजेण्डा बनाएको छु ।’
को हुन् योगेन्द्र ?
जीवन विकास लघुवित्त वित्तीय संस्थाबाट राजनीतिमा उदाएका धनपालथान गाउँपालिका–२ का योगेन्द्र २ दशकअघि स्थापना गरेको जीवन विकास लघुवित्त संस्थाका संस्थापक अध्यक्ष हुन् ।
२०५४ सालमा स्थापना गरेको सो संस्थाले २४ जिल्लामा कार्यक्षेत्र विस्तार गरेको छ । ३ लाखभन्दा बढी सदस्य रहेको सो संस्थामा १ हजार २०० भन्दा बढीले प्रत्यक्ष रोजगारी पाएका छन् । लघुवित्त संस्थाको उपलब्धि र कामले प्रत्यक्ष रुपमा क्षेत्र ५ का जनतामा प्रभाव परेको छ ।
५ नम्बर क्षेत्रका नागरिकको जीवनस्तर उकास्ने उद्देश्यसहित स्थापना भएको जीवन विकास लघुवित्तले स्वास्थ्य, शिक्षाको क्षेत्रमा पनि उत्तिकै प्रभावकारी भूमिका खेल्दै आएको छ ।
२ वर्षभित्र ३ सय शय्याको सुलभ अस्पताल संचालनका लागि उनको नेतृत्वमा संरचना निर्माण भइरहेका छन् ।
आफूले संचालनमा ल्याएको लघुवित्तमा सफलता हासिल गरेपछि उनी नेकपा एमालेमा प्रवेश गरेका थिए । २०७४ सालको निर्वाचनपछि उनले एमालेबाट नै मोरङ क्षेत्र ५ मा केन्द्रित रहेर राजनीति शुरु गरेका थिए ।