विराटनगर, ११ मंसिर । प्रदेश नं. १ का आन्तरिक मामिला तथा कानुन मन्त्री केदार कार्कीले प्रदेशसभा सदस्यमा निर्वाचित भएपछि सम्पन्न बस्ती पुगेर स्थानीय ऋषिदेव समुदायँग आर्शिवाद लिनु भएको छ ।
विराटनगर–१२ मा मन्त्री कार्कीको पहलमा १४५ घर निर्माणाधीन छन् । मन्त्री कार्की नेपाली कांग्रेसबाट प्रदेश निर्वाचन क्षेत्र मोरङ ६ ‘ख’ बाट निर्वाचित हुनु भएको हो ।
आइतबार बस्ती पुग्नु भएका कार्कीले ऋषिदेव समुदायका अग्रहरुसँग भेट गरी आर्शिवाद लिनु भएको छ । मन्त्री कार्कीले स्थानीय ऋषिदेव समुदायका ज्येष्ठ नागरिकको आर्शिवाद लिँदै भन्नुभयो, “म तपाईहरुकै आर्शिवाद र भोटले निर्वाचित भएको हुँ । म अनियमितता गर्दिन तपाईंहरुको प्रतिनिधि भएर देश र जनताको विकासमा खटिने छु ।” कार्कीले यो जित विपन्न र भुइँमानिसहरुको भएको भन्दै ज्येष्ठ नागरिकहरुलाई साक्षी राखेर भ्रष्टाचार नगर्ने संकल्प पनि गर्नुभयो ।
कार्कीले विपन्नहरुको नभएर यो बस्ती सम्पन्नहरुको हुने बताउँदै सुकुम्बासी भनेर गरिने अवहेलनाविरुद्ध आफू सदैव सक्रिय हुने बताउनु भयो । त्यस अवसरमा ज्येष्ठ नगारिकहरुले मन्त्री कार्कीलाई आर्शिवाद दिँदै सदैव जनसेवामा इमान्दार भएर लाग्न आग्रह गरे । कार्की निर्वाचित भएपछि मतदातालाई धन्यवाद दिन घरदैलो गरिरहनु भएको छ ।